Qara Qarayevin xatirəsinə ucaldılmış abidənin açılışı olub

Fevralın 3-də Bakının 28 May küçəsində dünya şöhrətli bəstəkar Qara Qarayevin xatirəsinə ucaldılmış abidənin açılışı olub.

Azərbaycan Respublikasının Prezidenti İlham Əliyev və xanımı Mehriban Əliyeva açılış mərasimində iştirak ediblər.

Hündürlüyü 3 metr olan, qranitdən hazırlanmış abidənin müəllifi Xalq Rəssamı Fazil Nəcəfovdur. Abidənin ətrafında geniş abadlıq işləri aparılıb.

Dövlət başçısı mərasimdə çıxış etdi.

Bakı Musiqi Akademiyasının rektoru, Xalq Artisti Fərhad Bədəlbəyli, Azərbaycan Yazıçılar Birliyinin sədri, Xalq Yazıçısı Anar, Qara Qarayevin tələbəsi, Xalq Artisti, bəstəkar Arif Məlikov Qara Qarayevin Azərbaycan musiqisinin inkişafındakı xidmətlərindən danışdılar, Azərbaycan musiqi sənətinin inkişafına göstərdiyi diqqət və qayğıya görə Prezident İlham Əliyevə təşəkkür etdilər.

Görkəmli bəstəkarın oğlu, Çaykovski adına Moskva Dövlət Konservatoriyasının professoru, Əməkdar İncəsənət Xadimi, bəstəkar Fərəc Qarayev də atasının xatirəsinə ucaldılmış abidəyə görə hər kəsə minnətdarlığını bildirdi.

Dövlət başçısı və xanımı abidənin önünə gül dəstəsi qoydular.

Prezident İlham Əliyev və xanımı Mehriban Əliyeva musiqi ictimaiyyətinin nümayəndələri ilə xatirə şəkli çəkdirdilər, onlarla söhbət etdilər.

Видео Qara Qarayevin xatirəsinə ucaldılmış abidənin açılışı olub канала First Vice President of Azerbaijan