26 мамыр мен 17 маусым аралығында қазақстандық оқушылар жазғы мектепке баратын болады

Қазақстандық оқушылар 26 мамырдан бастап, 17-ші маусымға дейін жазғы мектепте оқиды. Бірақ мұндай шешімге кейбір ата-аналар әзірден қарсылық білдіріп жатыр. Әсіресе ыстық өңірлерде балаларды салқындатқышы жоқ, қапырық сыныптарда отырғызу дұрыс емес деп санайды. Оның үстіне 20 күндік жазғы мектеп білім деңгейі төмендеген оқушылардың мәселесін шешпейді дейді. Мәселен, Ақтөбе облысындағы 400-ден аса мектептің тек тоқсанында ғана кондиционер орнатылған екен. Оның өзінде сыныптарда емес. Соған қарамастан, мамандар жазғы мектеп үшін кабинеттерге кондиционер орнатуға міндетті емеспіз деп отыр.
"Жазғы мектеп оқушылардың білімін жетілдіруге тамаша мүмкіндік" деген мамандардың пікіріне кейбір ата-аналар қарсы. Олар балаларымыздың жыл бойы оқығаны жеткілікті, енді үш ай демалғаны абзал дейді. Оның үстіне күннің ыстығында сыныпта ауа болмайды, өйткені мектептер салқындатқышпен жабдықталмаған деп отыр.
Алайда мамандар жазғы мектепте оқу дәстүрлі форматтан өзгеше болатынын айтады. Яғни, икемді оқу кестесін қолданбақшы. Оқушыларға баға қойылмайды, үй тапсырмасы берілмейді. Ал жазғы сабақ үшін барлық мектепті салқындатқыш техникалармен қамту міндетті емес деп отыр.
НҰРГҮЛ БЕРТІЛЕУОВА, Ақтөбе облыстық білім басқармасы басшысының орынбасары:
– Оқу кабинеттерінде кондиционердің болуы санитарлық талаптарға сәйкес келмейді. Класты желдету арқылы, сосын бір класта барлық 30 баланың бірдей отыруы міндетті емес. Ол жерде икемді оқу графигі болғаннан кейін класты екіге бөлу арқылы. Яғни балаларға осындай әртүрлі жағдай түрлері қарастырылады.
Ал Білім және ғылым министрлігі жазғы мектеп оқушыларға міндеттелмейтінін, соңғы шешімді ата-аналар өздері қабылдайтынын жеткізді. Бірақ біз кеңес береміз деп отыр. Сөздерінше, басқа елдерде оқушылардың сабақ үлгерімін шешу үшін оқу жылы ұзартылыпты.
ГҮЛМИРА КӘРІМОВА, ҚР БҒМ Мектепке дейінгі және орта білім беру комитетінің төрағасы:
– Ал біз оқу жылын ұзартпай, жазғы мектеп ұйымдастырдық. Біз барлық оқушыларды жазғы мектептен қалмауға кеңес беріп отырмыз. Жазғы мектеп біліміңізді шыңдап, олқылықтын орнын толықтыруға да мүмкіндік береді. Әрине, әртүрлі жағдайлар болуы мүмкін. Біреуі ауырып қалады, біреуі жазғы лагерьге барады және басқа да жағдайлар болады. Мұндай жағдайда жазғы мектепке қатысты соңғы шешімді ата -ана мен мектеп оқушылары өздері қабылдайды.
Жазғы мектепке 9 бен 11-ші сыныптың оқушылары қатыспайды. Олар емтихан тапсырады. Ал мұғалімдер 56 күндік демалысқа тек жазғы мектептен кейін ғана шыға алады.
Жанар Қожанова, Жомарт Құдайбергенов
Бізді әлеуметтік желіде оқыңыздар:
Youtube -https://www.youtube.com/channel/UCKJIfb3BN2x14J4U30wzLeA/featured?sub_confirmation=1
Facebook - https://www.facebook.com/informburo31/
Instagram - https://instagram.com/informburo31
Vkontakte - https://vk.com/informburo31
TikTok - www.tiktok.com/@informburo31
WhatsApp Информбюро +7 777 331 31 31

#ЖазғыМектеп #білім #Аймағамбетов #оқу_бағдарламалары

Видео 26 мамыр мен 17 маусым аралығында қазақстандық оқушылар жазғы мектепке баратын болады канала Информбюро 31