ඉතාලියේ පාසැල් අධ්‍යාපනය | Education system in Italy

මෙය ලංකාවේ සියලුම දෙනා නැරඹීය යුතුම වීඩියෝවකි. රටේ ඉහලම සිට පහලටම සියල්ලෝම ලංකාවේ අධ්‍යාපන ක්‍රමය ගැන තවත් ප්‍රමාද නොවී දැඩි අධ්‍යයනයක යෙදිය යුතුම බව මගේ අදහසයි. රටේ සියලුම උගතුන් බුද්ධිමතුන් එකතුවී මාස ගණනාවක් හෝ ගැඹුරින් සාකච්ඡා කොට ලංකාවේ දරුවන්ට නිදහස් අධ්‍යාපනයක් ලබාදීම කෙරෙහි අවධානය යොමුකොට දැනට සිදුවන අක්‍රමිකතා සහ වැරදි මැනැවින් අවබෝධ කොටගෙන පැහැදිලි දීර්ඝකාලීන සැලැස්මක් රජයට මෙන්ම සමස්ත ජනතාවට ඉදිරිපත් කිරීමට තවත් පමා විය යුතු නැත. එහිදී ලෝකයේ දියුණු රටවල අධ්‍යාපන ක්‍රමවේදයන් එකින් එක ගෙන අපේ ක්‍රමයන් හා සසඳා අඩුපාඩු හඳුනා ගත යුතුමය.
විශේෂයෙන්ම පාසැල් තුළ අධ්‍යාපනයට යොදවන වටිනා කාලය වෙනත් කිසිවකට නොයෙදිය යුතුය. දරුවන්ගේ ස්වභාවික වර්ධනය හා එන සිතුම් පැතුම් වලට වැටවල් දමා පාසැල සිරගෙයක් බවට පත් නොකොට යුතුය.

සමස්ථයක් වශයෙන් ගත් විට ලංකාවේ අධ්‍යාපන ක්‍රමවේදයේ බරපතලම පරිවර්ථනයක් සිදු කිරීම අත්‍යාවශ්‍ය වන්නේ වත්මන් අධ්‍යාපන ක්‍රමය මගින් ඉතා අඩු ප්‍රතිශතයකින් උගතුන් බිහිකරන නමුත් බුද්ධිමතුන් බිහි නොකරන බැවිනි. අපේ අධ්‍යාපන ක්‍රමය තුළ බුද්ධිමතෙකු බිහි කිරීමට අවශ්‍ය මූලික පසුබිමවත් නොමැති වීම කැපී පෙනේ.
දරුවන්ව දැඩි ලෙස අනිසි පීඩනයට ලක් කෙරෙන ලාංකික අධ්‍යාපන ක්‍රමය වත්මන් ලෝකයට අනුව බරපතල ලෙස ළමා මානව හිමිකම් උල්ලංඝනය කිරීමක් ලෙසද සැළකිය හැක. දැනුවත්ව හෝ නොදැනුවත්ව වැරදි අධ්‍යාපන ක්‍රමවේදයන් සහ වැරදි මතවාද නිසා ගුරුවරු සහ දෙමාපියන්ද දැඩි මානසික පීඩනයන්ට යටත් කරනු ලැබීම සමාජ අර්බූදයක් ලෙස වර්ධනය වී තිබේ. දියුණූ ලෝකයේ අධ්‍යාපනය යනු දරුවා සහ දැණුම අතර තරඟයක් වුවද ලංකාවේ එය දරුවන් සහ දෙමාපියන් අතර තරඟයක් බවට පත් කොට තිබේ. තමාගේ ලඟම සිටින හොඳම මිතුරා හෝ මිතුරියද මෙම තරඟයේදී තම ප්‍රතිවාදීන් ලෙස දකින්නට දරුවන් පොළඹවා තිබීම මගින් සමාජමය වෛරය, ක්‍රෝධය, ඊර්ශ්‍යාව සිත් තුළ පැලපදියම් වන අතර දෙමාපියන් සහ ගුරුවරුන් තුරඟ තරඟයකට තම අසුන් යොදවා බලා සිටින සූදු කාරයන්ගේ තත්වයකට ඇද දමා තිබේ. වත්මන් සමාජයේ සමස්ත අර්බූදයන්ගේ මූලික අඩිතාලම ඇත්තේ අපේ යල්පැන ගිය අනුවන අධ්‍යාපන ක්‍රමය තුළ බව වගකිවයුතු කිසිවෙකුට හෝ නොපෙනීම නොදැනීම සැබැවින්ම ඛේදවාචකයක් ලෙස මා දකිමි.

ලංකාවේ අධ්‍යාපන ක්‍රමය ගැන මා තුළ ඇත්තේ බලවත් අප්‍රසාදයකි. ලෝකයේ අනෙකුත් රටවල අධ්‍යාපන ක්‍රමයන් හා සසඳා බැලීමේදී ලංකාවේ අධ්‍යාපන ක්‍රමය අතිශයින්ම දූෂිත වූද පැහැදිලි සැළසුම් රහිත වූද, අයාලේ යන ලෙස නොසැලකිල්ලෙන් අත් හැර දැමුනු ක්‍රියාවලියක් බව පෙනෙන සාදක වලින් පිරී පවති.. කිසිවෙකුගේ කිසිදු පැහැදිලි අධීක්ශනයකින් හෝ ගඹුරු දැක්මකින් හෝ තොරව ඔහේ යන්නන් වාලේ යන අධ්‍යාපන ක්‍රමයක් ලංකාවේ ඇති බවට ඔබට ඉතා හොඳින් තේරුම් ගැනීමට මෙම වීඩියෝව ඉවහල් වනු ඇත.

Facebook : https://www.facebook.com/LokewateSudanthaka
Instagram : https://www.instagram.com/LokewateSudanthaka/
Facebook Group : https://www.facebook.com/groups/258798072350671

#SinhalaYoutube #LokewateSudanthaka #Romania_Working_Visa

Видео ඉතාලියේ පාසැල් අධ්‍යාපනය | Education system in Italy канала Lokewate Sudanthaka