«Не деген сұмдық, ит боп жүрміз!». Халыққа қызмет көрсету орындарында коллапс басталды

Бірнеше күннен бері аптап ыстықта мыңдаған ел азаматы темір тұлпарын тіркеп, кейбірі көлігін сатқанын есептен шығара алмай әлек. Арасында жүргізуші куәлігін рәсімдей алмай жүргендер де жетерлік. Мамандандырылған халыққа қызмет көрсету орталығының қызметкерлері бұған Ішкі істер министрлігіне қарасты базаның істен шыққаны себеп деп отыр. Қызыл аймақтағы Алматыдағы ахуалды әріптесім Әйгерім Ердәулет көріп қайтты.
ӘЙГЕРІМ ЕРДӘУЛЕТ, тілші:
– Алматыдағы "Саялы" ықшам ауданында орналасқан мамандандырылған халыққа қызмет көрсету орталығының іші адамға лық толы. 30 градус ыстыққа шыдамаған көпшілік салқын ғимараттың ішіне кірген.
Күніне 300-ден астам алматылықтың ковид жұқтырғаны анықталып жатса да, халыққа қызмет көрсету орталығының ішінде тойға жиналған қауымнан кісі көп. Барлығы да алдын-ала электронды түрде кезек алған соң, орталық жұмыс істейді екен деген оймен келіпті.
Кезегін брондап барып келген кісіні кіргізбеуге құқығымыз жоқ дейді орталық өкілдері. Кешегіден қарағанда бүгін клиенттердің екі есе көп екенін айтқан олар, түс ауа база іске қосылмаса, жұртты таратпақ.
ЕДІГЕ СӘТЕБАЕВ, Алматы қаласы мамандандырылған ХҚКО бас маманы:
– Алатау ауданының полиция қызметкерлері қазір келеді. Сол кісілер осы жерде болады.
– Не үшін келеді?
– Ол кісілер осы жерде тәртіп сақтау үшін, араздық болмауы үшін. Егер қайтарған жағдайда көмек көрсету үшін.
Қазақстан бойынша істен шыққан бірыңғай жүйенің ақауына тікелей Ішкі істер министрлгі жауапты. Дәлірек айтқанда, министрліктің авто қызметтерді көрсететін базасы істемей тұр. Электронды жүйенің аяқ-асты істемей қалатынын Басқарма Төрағасы растап отыр.
ӘДІЛ ҚОЖЫҚОВ, "Азаматтарға арналған үкімет" АҚ басқарма төрағасы:
– Иә, мұндай жағдай жиі болып тұрады. Біз әр түрлі 52 мемлекеттік базалардың дерек қорымен ақпараттық жүйеде жұмыс істейміз. Бұл жолы Ішкі істер министрлігінің әкімшілік комитетінің авто қызметтерді көрсететін базасының тоқтап қалғанына меніңше -құрылғының істен шығуы себеп болған. Егер, жүйе іске қосылса, жұмыс кестесінен тыс соңғы клиентке дейін қызмет көрсетіледі.
Күніне мың адамның дерегін базаға тіркейтін Алматыдағы бір ғана орталық бүгін соңғы клиентке дейін қызмет көрсете алмады. Кеше толықтай өшкен жүйені бүгін қайта іске қосуға тырысамыз деген Ішкі істер министрлігінің мамандары, бүгін де базаны пайдалануға бере алмады. Ал тойдың үстінен топ етіп түсетін мониторингтік топтар шағым түскен кезде ғана жетіп баруға әзір екен.

Әйгерім Ердәулет, Геннадий Лукин
Бізді әлеуметтік желіде оқыңыздар:
Youtube -https://www.youtube.com/channel/UCKJIfb3BN2x14J4U30wzLeA/featured?sub_confirmation=1
Facebook - https://www.facebook.com/informburo31/
Instagram - https://instagram.com/informburo31
Vkontakte - https://vk.com/informburo31
TikTok - www.tiktok.com/@informburo31
WhatsApp Информбюро +7 777 331 31 31

#ХҚКО #АвтоЦон #коллапс #кезек #Алматы

Видео «Не деген сұмдық, ит боп жүрміз!». Халыққа қызмет көрсету орындарында коллапс басталды канала Информбюро 31