Кичик сержант: Мени алдаб судлашди

Чирчиқ Олий танк қўмондон-муҳандислик билим юртида омбор мудири бўлиб ишлаган кичик сержант Козим Искандаров OzodMikrofon дастурига мурожаат қилиб, ўзининг ноҳақ судлангани юзасидан шикоят қилди.

32 яшар Искандаровга кўра, 1,5 йил аввал билим юрти омборидаги 32 миллион сўмлик камомад учун уни ноҳақ айблашган.

Искандаров иддаосига кўра, у прокуратура ходимларининг ишни ёпиш ваъдасига ишониб, омбордаги камомадни бўйнига олган ва натижада ишдан ҳайдалган.

Қашқадарё вилоят, Касби туманида яшовчи 32 яшар Козим Искандаровнинг 22 февраль куни Озодликка боғланиб, айтишича, 2019 йил сентябрида Чирчиқ Олий танк қўмондон-муҳандислик билим юрти омборида фош қилинган камомад учун уни ноҳақ айблашган:

- Чирчиқ Олий танк қўмондон-муҳандислик билим юртида омбор бошлиғи лавозимида ишлаганман. 2019 йил сентябрида Мудофаа вазирлигидан текширувчилар келди. Тафтиш ўтказишди. 32 миллион сўм камомад чиқди. Камомад менинг бўйнимга юкланди, лекин мен буни сотмаганман. Мудофаа вазирлиги текширувчилари ишни Чирчиқ ҳарбий прокуратурасига ўтказишди. Прокурорлар менга тазйиқ ўтказишди. Ёқамдан ушлаб “ҳароми” деб сўкиб, “бўйнингга оласан ёки сени қаматаман” деди. Мен сотмаганман дедим. Сотмаган нарсани қандай сотдим дейман. Кейин мени алдашди. “Қўл қўйиб берасан, сенга ҳеч ким тегмайди” деди. Алдашиб ҳужжатларга қўл қўйдириб олишди. Кейин судда ҳам шундай дейсан деди. Кейин судлангансан деб, мени заҳирага бўшатишди. Уйдаги бор- будимни, мол-ҳолни сотиб камомадни ёпдим. Бировдан қарз олдим. Банкдан кредит ҳам олдим. Энди мен емаган сомсага пул тўлаб, уйда ишсиз ўтирибман.

Видео Кичик сержант: Мени алдаб судлашди канала Ozodlik Radiosi