Енді бірде-бір заң халықпен талқыланбай жазылмайды

Қазақстанда енді кез келген заң халықпен талқыланбай жазылмайтын болды. Бүгін сенат бірқатар өзгерістер енгізілген заңжобасын қабылдады. Яғни, енді нормалар әзірленер алдында ең әуелі ел пікірі тыңдалып, содан кейін ғана құжаттың концепциясы әзірленетін болды. Бірақ Қазақстанда осыған ұқсас тәжірибе бұрыннан бар. Арнайы сайтқа ілінген құжатты азаматтар талқылап, пікірілерін жазады. Алайда мұны ескеріп жатқан шенеунік аз.
2016 жылы халықтың жаппай алаңға жиналып атой салуына себеп болған «Жер кодексіне» жасалған өзгертулер еді. Жұртшылықтың пікірін ескермеген үкімет сол кезде ауылшаруашылығы жерлерін шетелдіктерге 25 жылға жалға береміз деген норма енгізіп жіберген. Мұны кешірек білген көпшілік дүрк көтеріліп, белсенділер сотталып, заңжобасына мараторий жарияланған болатын.
Ал мынау Нұр-Сұлтанда тұратын көпбалалы аналар. Олар да еш талқылаусыз әзірленген "Тұрмыстық зорлық-зомбылық туралы" заңының бірқатар жалпылама жазылған баптарына қарсылық танытып, министрлер мен депутаттардан түсініктеме беруді талап еткен болатын. Бүгін сенаторлар нормашығармашылықты жетілдіру бойынша заңжобасына толықтырулар енгізіп, енді кез келген заң әзірленбес бұрын халық пікірі есепке алынады деген өзгертулерді мақұлдады.
МАРАТ БЕКЕТАЕВ, ҚР Әділет министрі:
– Әзірлеуші органдар реттеушілік саясаттың консультативтік құжатын әзірлейді. Бұл құжатта проблемалар мен ықтимал шешімдер көрсетіледі.
Екінші. Заң жобаларын қоғамдық талқылау тәсілдерін кеңейту. Азаматтарды жаңа реттеуге алдын ала дайындау мақсатында әрбір заң жобасы мен қабылданған заң ақпараттық түсіндіру бағдарламасымен сүйемелденетін болады.
Тіпті, қабылданған заңды жүзеге асырмас бұрын, оның қолданысқа біртіндеп енгізіп, өтпелі кезеңге уақыт берілетін болады. Ал Сенатор Дана Нұржігіт заң жобаларының өңірлердегі тұрғындарға жетпей жататынын атап өтті. Өзге депутаттар қабылданған заңдарды халық түгіл орындаушылардың да дұрыс түсінбейтінін айтты.
Ал саясаткер Зәуреш Батталова "шенеуніктер білмеген, түсінбеген жұртшылыққа түсіндіруге міндетті" дейді. Айтуынша, бұл халықаралық стандартта бар талап екен.
ЗӘУРЕШ БАТТАЛОВА, "Қазақстандағы парламентаризмді дамыту қорының" президенті:
– Біз ол чиновничктерді халықтың салығына тайраңдатып неге отырғыздық?! Сол халыққа қызмет жасау үшін. Өкінішке орай, кейбір заңдар тығылып жасалады деп айтуға болады. Сайлаудың заңын алсақ, тағы бірнеше заңды өкінішке орай нақты жариялап көрсете алмады парламент. Өздерінің бір саяси ойыны болған шығар.
Жалпы Қазақстанда 2,5 мыңнан астам заң қабылданыпты. Олардың 301-і дербес, 90%-ы өзгерістер мен толықтырулар енгізу туралы заңдар екен. Ал Зәуреш Батталова 50 рет өзгертілген заңның түпнұсқасынан түк қалмайды, мұндайды доғару керек дейді.
Гүлназ Сайлауқызы, Нұркен Тоқмурзин
Бізді әлеуметтік желіде оқыңыздар:
Youtube -https://www.youtube.com/channel/UCKJIfb3BN2x14J4U30wzLeA/featured?sub_confirmation=1
Facebook - https://www.facebook.com/informburo31/
Instagram - https://instagram.com/informburo31
Vkontakte - https://vk.com/informburo31
TikTok - www.tiktok.com/@informburo31
WhatsApp Информбюро +7 777 331 31 31

#заң_жобалары #халық_пікірі

Видео Енді бірде-бір заң халықпен талқыланбай жазылмайды канала Информбюро 31