Кетіп бара жатып, бөлшектері шашылатын трамвайлар жұрттың күлкісіне қалды

Өскемендегі трамвайлар тағы да жұрттың күлкісіне қалды. Бұл жолы жолда кетіп бара жатқан қоғамдық көліктің бөлшектері шашылды. Темір дөңгелекті көлік тоқтап, жолынан қалған жолаушылар ашуланса да шашылған бұрандаларын санап, ұялы телефондарына түсірген. Қазір қала әкімдігі дәл осы трамвай жолаушылары үшін электронды билет енгізіп жатыр. Ал қала тұрғындары билеттен бұрын, техниканы жөндеген әлдеқайда дұрыс еді деген пікірде.
Бұл жұмыстан қайтқан жолаушылардың жолда қалған сәті. Үйіне асыққан ел ары қарай қалай жететіндеріне алаңдағанын айтып жатыр. Шашылған бөлшектерін күле жүріп, кондукторға жинауға көмектесейік дейді.
Темір дөңгелекті қоғамдық көлік бұған дейін де талай тоқтап қалған болатын. Бағытқа шыға сала біресе жолдан шықты, біресе бұзылды. Әйтеуір ілініп-салынып қызмет көрсететінін мұндағы ел біледі. Өскеменнің өзінің трамвайлары әбден ескірген. Сондықтан оны жаңалау үшін Алматы қаласына керексіз болған мына трамвайларды 2018 жылы әкелген-ді. Осылайша жолаушыларын арагідік әбігерге салатын қоғамдық көліктің бұл түріне енді электронды билет енгізіліп жатыр. Мемлекет пен жеке серіктестік жобасы аясында жүзеге асып жатқан жұмысқа барлығы бір миллиард жеті жүз төрт миллион теңге жұмсалған. Ал бұл жобаның жүзеге асуына қатысты қала халқының пікірі екі ұдай.
Жолаушы тасымалдаушылар бұл жүйені алдағы уақытта автобустарға да енгізетіндерін айтты. Десек те, қаладағы қоғамдық көліктердегі ақша жинау жүйесіне өзгеріс енгізілгенімен ескі көліктердің қашан жаңаратыны әлі белгісіз.

Жанболат Санияз
Бізді әлеуметтік желіде оқыңыздар:
Youtube -https://www.youtube.com/channel/UCKJIfb3BN2x14J4U30wzLeA/featured?sub_confirmation=1
Facebook - https://www.facebook.com/informburo31/
Instagram - https://instagram.com/informburo31
Vkontakte - https://vk.com/informburo31
TikTok - www.tiktok.com/@informburo31
WhatsApp Информбюро +7 777 331 31 31

#информбюро #ащы_шындық #алматы_трамвай

Видео Кетіп бара жатып, бөлшектері шашылатын трамвайлар жұрттың күлкісіне қалды канала Информбюро 31