«Қанымызды тірідей ішіп жатыр». Масаға таланған семейліктер бұдан әрі шыдау мүмкін емес деп отыр

Шығыста семейліктер масаға таланып жатыр. Тура мағынасында, біздің қанымызды тірідей ішіп жатыр деген тұрғындар бұдан әрі шыдау мүмкін емес дейді. Ал әкімдіктегілер қаладағы қоғамдық орындардағы масалардың көзін жоямыз, ал ауладағы жәндіктерді өлтіру біздің жұмысымыз емес дейді.
Кешкі салқынмен серуендеуге шықсақ болды масаға таланып қайтамыз деген тұрғындар, дезинфекция мүлде жасалмаған деп отыр. Ауру таратқыш жәндіктердің көзін дер кезінде құртпаса, эпидемия кезінде жығылғанға жұдырық болады деп қорқады мұндағы жұрт.
АЛЬДИНА МАНАРБЕКҚЫЗЫ, Семей қаласының тұрғыны:
– Міні жан жақтан қолымыздың бәрі, аяғымызды бәрін маса шағып тастады. Міне балалар да қасынып, қолының бәрі қызарып кетті. Білмейміз не істеу керектігін?!
ЭЛЬМИРА ОРАЗМҰХАМЕДОВА, Семей қаласының тұрғыны:
– Ылғида осы жерге келіп, дем алғым келеді балаларымды алып. Міне келіп едім масадан жүре алмай жатырмыз. Балалардың өзін шағып. Қазір үлкен-үлкен масалар, жағдайымыз онша болмай жатыр.
Ал қоғамдық орындардан бөлек, Ертіс пен ылғалды батпақты жердегі үйлердің тұрғындары мүлде есік алдына шығудан қалдық дейді. Өйткені аулаға шыққан балалардың денесі қызара бөртіп келеді екен. Аллергиясы бар адамдар мен жүкті әйелдерді шақса соңы неге апарарын ойлаудың өзі қорқынышты дейді халық. Әкімдіктегілер халық көп жиналатын орындарға ғана дезинфекция жасайды. Ал тұрғындар өз аулалараын өздері залалсыздандыру керек екен.
АЗАМАТ КӨМЕКОВ, Семей қаласы ТҮКШ және тұрғын үй инспекциясы бөлімінің бас маманы:
– Тұрғындардың өздері үйлерінің жертөлелерін өңдемейді. Масалар көбінесе қараңғы және ылғалды жерлерде көп болады. Сондықтан халық дер кезінде залалсыздандыру жұмыстарын жүргізгенде мұндай жағдай болмас еді. Бұл жағдайдан бірге шығар едік.
Зиянкестердің көзін жою үшін қалалық бюджеттен екі миллион теңге бөлінген. Бірақ сол қаржының сегіз жүз жиырма мың теңгесі ғана қансорғыштарды жоюға жетеді екен. Ал қалған сомасы қайда жұмсалары әлі белгісіз, бәлкім қосымша аудандарды дезинфекциялауға кетуі мүмкін.

Динара Ерболқызы, Ғибрат Ерланов
Бізді әлеуметтік желіде оқыңыздар:
Youtube -https://www.youtube.com/channel/UCKJIfb3BN2x14J4U30wzLeA/featured?sub_confirmation=1
Facebook - https://www.facebook.com/informburo31/
Instagram - https://instagram.com/informburo31
Vkontakte - https://vk.com/informburo31
TikTok - www.tiktok.com/@informburo31
WhatsApp Информбюро +7 777 331 31 31

#масаға_таланған_халық #Семей

Видео «Қанымызды тірідей ішіп жатыр». Масаға таланған семейліктер бұдан әрі шыдау мүмкін емес деп отыр канала Информбюро 31