Сенек ауылының бүгінгі күнгі жағдайы.

Қарақия ауданының әкімі Ә. Дауылбаевтың назарына

Маңғыстау облысының Қарақия ауданындағы Сенек ауылы тұрғындарының аманаты

Құрметті Қарақия ауданының әкімі Әділбек Дауылбаев мырза!

Біз бастап көтерген Тұщықұдық ауылының су мәселесін облыс әкімі Алик Айдарбаев тікелей бақылауға алып, нәтижесінде сең қозғалып, ауылдағы сумен қамтамасыз етіп отырған резервуарды тазарту жұмыстары жүргізілгенінен көзі қарақты қауым құлақтанып отыр.
Енді осы жағдайдан кейін бізге Сенек ауылының тұрғындары хабарласып, ауыл азаматтарының арнайы шақыртуымен барып, ауылдағы ондаған жылдардан бері шешімін таппай қордаланып қалған мәселелермен танысып, Сенек тұрғындарының аманатын, Сізге бағыштаған арзу-арманын, мұң мұқтажын арқалап қайттық. Енді соған көшейік.
2013 жылы облысқа Алик Айдарбаев мырза әкім болып тағайындалғаннан кейін Сенек ауылына келген сапарында осы мәселелерді шешуге уәде берген екен, алайда белгісіз себептермен ол мәселелер әлі шешілмей келеді.
Нақты айтар болсақ, Сенек ауылында басы сонау 2002 жылдан бері қанша әкім ауысса да шешілмей келе жатқан мәселелер:
- Қызылсай-Сенек автожолының жағдайы 7-8 жылдан бері жөндеу көрмеген, өте нашар жағдайда;
- су қоры аса мол Түйесу су массивінің үстінде отырса да ауыл дұрыс ауыз суға жарымай отыр;
- 2002 жылдан бері жаңадан берілген жер учаскелеріне электр желісі тартылмаған, тұрғындар тоқты өз күшімен ағаш бағаналар арқылы кабель сымдармен тартқан, олар қазір айналаға қауіп төндіріп тұр;
- ауыл жанындағы тері цехынан шыққан қалдық суының исіне адам шыдауы мүмкін емес, сол иіс жел оңтүстік жақтан тұрса ауылға жайылады;
- тұрғындардың 70 пайызы «Өзенмұнайгаз» АҚ-на қарасты мекемелерде жұмыс жасағандықтан, таңертең жұмысқа барып, кешке қайтуы үлкен мәселе көрінеді. Осыны шешу үшін сол мекемелерде автобус айдайтын ауыл тұрғындарын Сенек-Қызылсай бағытына таңертең-кешке бір рет (маршрут қатынасына бөлек) уақытылы қатынас жасаса деген өтініштері бар;
- 2014 жылы салынған футбол алаңы жұлым-жұлымы шығып, пайдаға аспай қалған;
- Республикалық жарыстардан жүлде алып жүрген спортшылар ауыл азаматтарының өз қаражаттарына алған темір-терсегімен (спорт инвентарлары) атам заманғы совхоздың жем сақтау қоймасында жаттығып жүр екен. Жем қоймасының жағдайы адам шошырлық! 21 ғасырда мынадай сиқы мал қорадан сәл ілгері жем қоймасында жаттығу деген өте ұят!
- ауыл спортына жанашыр болады-ау дейтін ауыл әкімінің өзі мектепке «Өзенмұнайгаз» АҚ демеушілігімен алып пайдалануға берілген су жаңа «Газель» автокөлігін баласына беріп, жеке бас мүддесіне пайдаланады екен. Мектеп оқушылары амалсыз білім, өнер мен спорт сайыстарына өз қаржыларына такси жалдап барады дейді. Күні кеше Өзіңіз жақсы білесіз, облысымызда осындай арнайы көлік жоқтығынан спортшы балалар таксимен апатқа ұрынып, өте өкінішті жағдай болды. Ал, сондай жағдай осы Сенек ауылының оқушыларының басында тағы қайталанбасына кім кепіл? Сонда қайтеміз? Ауыл әкімін кінәлап отыра береміз бе?



«Сонда осы уақытқа дейін бюджеттен, ауыл іргесіндегі жерасты байлығын игеруші мекемелерден ешқандай қаражат бөлінбегені ме?» деген сұрағымызға ауыл азаматтары 2005 жылдан 2011 жылға дейін «Өзенмұнайгаз» АҚ-ның Сенек селосының инфрақұрылымын дамытуға 255 млн теңге, 2012-2016 жылдары 89 млн теңге бөлінгені туралы жауап хатын ұстатты. Алайда, ауыл тұрғындары ол қаржыдан дым көрген жоқпыз деп отыр! Ол ақшаның барлығы «Сенек» ЖШС-нан ауыспайды дейді. 336 млн теңгенің есебі қайда?

Ауыл, аудан әкімдері жыл сайынғы есеп берулерін жасырын жасайды, бөтен адамды кіргізбейді деп отыр. Ауыл, аудан әкімдеріне жазған арыз-өтініштерден пайда жоқ деп түңіліп отыр. Облыстық, аудандық бюджеттен Сенек ауылына бөлініп жатқан қаражаттың есебі бар ма?

Құрметті Ә. Дауылбаев мырза! Сенек ауылының ондаған жылдардан бері қордаланып келе жатқан жол, ауыз су, тоқ, әлеуметтік мәселесін шешу үшін мәслихат, құқық қорғау органдарын араластыра отырып, облыстық деңгейде арнайы комиссия құруға жұмыстануыңызды сұраймыз. Ал енді осы ауыл тұрғындарының жанайқайына аудан, қала берді облыс басшылары назар аудармаған жағдайда 2011 жылғы Жаңаөзен факторы сияқты тұрмыстық-әлеуметтік мәселелер жиналған үстіне жиналып, ушығып, күндердің күнінде жарылуы мүмкін екендігін, оның салдары ауыр болуы мүмкін екенін қаперіңізге бере отырып, сондықтан, салдармен емес, себеппен күресуге шақырамыз!
Құрметті әкім мырза! Ауыл тұрғындарының аманатын жеткізе отырып, күрделі мәселелерді шешудегі тәжірибеңізге сенім артамыз. Ауыл тұрғындарының жанайқайы ескерусіз қалдырмайды деп сенеміз.

Видео Сенек ауылының бүгінгі күнгі жағдайы. канала Берік Дауенов