Ш. Жўраевнинг ўғли отасининг Роғун ҳақида қўшиқ айтганини инкор қилди

Шерали Жўраевнинг Интернетда тарқалган навбатдаги қўшиғи Роғун ва Қамбарота ГЭСларининг экологик зарарига бағишланди. Ўзбекистон халқ шоири Иқбол Мирзо сўзи билан ёзилган мазкур қўшиқ Амударё ва Сирдарёнинг юқори оқимларида қурилаётган йирик гидроиншоотларнинг минтақамизга етказиши мумкин бўлган зарарини оҳанг василасида ифода этади.
Ўзбекистон халқ артисти, 67 яшар Шерали Жўраев Роғун ва Қамбарота ГЭСлари ҳақидаги қўшиғи Интернетга сизиб машхур бўлаëтган бир пайтда ҳофизнинг ўғли Зоҳиршоҳ Жўраев бу қўшиқнинг отасига оидлигини рад қилди.

Интернетдаги sayyod.uz нашри, Зоҳиршоҳ Жўраев "Бугунги кунда интернетда тарқалган Шерали Жўраевнинг янги сув(ГЭС)га аталган қўшиғи хақидаги хабарларни инкор этди!" дея хабар тарқатди.

Зоҳиршоҳ Жўраевнинг айтишича¸ "Отаси бундай қўшиқ куйламаган, шунчаки бир ижодкор тарафидан таклиф бўлган холос".

Бундан аввал Шерали Жўраевнинг экологик мавзуда қўшиқ айтганини ҳофизнинг матбуот котиби Озодликка тасдиқлаган эди.

Ҳофизнинг шахсини очиқлашни истамаган матбуот котиби "қўшиқ тайёр бўлса-да, ҳофиз уни янада қиёмига етказиш устида изланаëтганлигини" билдирган эди.

Интернетда тарқалган қўшиқ аудиосини ummonmp3.net нашридан ҳам юклаб олиш мумкин.

Ўзбекистондаги Уммон гуруҳининг ўзини Анвар деб таништирган продюссери Шерали Жўраевнинг бу қўшиғини Интернетга жойламагани ва ummonmp3.net нашрига алоқаси йўқлигини айтди.

Видео Ш. Жўраевнинг ўғли отасининг Роғун ҳақида қўшиқ айтганини инкор қилди канала Ozodlik Radiosi