Сумкасидан М.Солиҳ китоби чиққан шоир терговга боришдан бош тортди

Сумкасидан Муҳаммад Солиҳ китоблари чиққани учун жиноий иш очилиб терговга чақирилган хоразмлик 60 яшар шоир Маҳмуд Ражаб 20 сентябрь куни терговга бормаслиги ҳақида баёнот берди.
"Элтуз"га етиб келган хабарларга кўра, Маҳмуд Ражабни олиб кетиш учун милиция капитани Бекчанов бошчилигида Хоразм вилоят ИИББ ходимлари келишган, бироқ Маҳмуд Ражабнинг маҳалладошлари уни милиция олиб кетишига фаол қаршилик кўрсатишган.

"Менинг халқ олдида ҳам, виждоним олдида ҳам, ҳукумат олдида ҳам, қонун олдида ҳам ҳеч қандай айбим йўқ. Йўқлигини исботлашга тиришдим, лекин фойдаси бўлмади. Президентга уч марта мурожаат ёздим. Республика Бош прокурорига, Ички ишлар вазири Пўлат Бобожоновга қайта-қайта мурожаатлар ёздим.

Булар ҳаммаси кўриб чиқилмади. Кўпчилигига жавоб ҳам берилмади. Ички ишлар ходимлари устма-уст ноқонуний ишлар қилмоқда, лекин мен ҳозиргача ноқонуний иш қилмадим. Бундан кейин қиладиган ишим ҳам ноқонуний иш бўлмайди. Виждонимга ҳам давлатга ҳам қарши бўлмийди. Лекин ўз ҳуқуқларимни ҳимоя қилишга қаратилган бўлади.

Конституцион ҳуқуқларимдан фойдаланиб, ҳарқаро ва респулика қонунлари доирасида ўзимни ўзим ҳимоя қилишга мажбур бўламан. Энди мен ана шу "жиноят ишини" шу лаҳзадан бошлаб бутунлай рад қиламан. Ички ишлар ходимларининг шу масалада мен билан бўладиган ҳар қандай муомаласидан воз кечаман. Бу масалада уйга чақирув қоғози келса қабул қилмайман. Биронта ходим келса қабул қилмайман. Гаплашмайман. Бундан кейин шу ишни олиб бораётган терговчи билан ҳам алоқани узаман.

Ўзимни ўзим инсонийлик принципларидан келиб чиқиб ҳимоя қиламан. Чунки бу мени 5 йил қамашга қаратилган, мени кўра олмайдиган бировларнинг иши" деди маҳалладошлари ва видеокамера олдида Маҳмуд Ражаб.

Эслатиб ўтамиз, Маҳмуд Ражаб шоир Муҳаммад Солиҳ асарларини Ўзбекистонга олиб кирганликда асоссиз айбланиб терговга тортилган. "Элтуз" нашри шоир Маҳмуд Ражаб тақдири билан боғлиқ воқеаларни кузатишда давом этади

Видео Сумкасидан М.Солиҳ китоби чиққан шоир терговга боришдан бош тортди канала El Tuz