Fakt va Fikr (Maxsus-1): “Arqadağ”ga la’nat!

“Озодлик” радиоси туркман хизмати, “Настоящее время”, “Хроника Туркменистана”, “Демократический выбор Туркменистана” интернет нашрларнинг ёзишича, Туркманистон президенти Гурбангули Бердимухаммедовнинг яқинлари 14 яшар дзюдочи Сулаймон Турсунбоевни калтаклаб ўлдиришган.

Воқеа шу йил феврал ойида Ахал вилояти Баҳордон туманида содир бўлган. Дзюдо бўйича шу ерда ўтказилган чемпионат финалида 14 яшар Сулаймон Турсунбоев Туркманистон Ички ишлар вазирлигига қарашли мактаб курсантига ўйинни ютқазиб беришдан бош тортган.

Дашўғуз вилояти Кўҳна Урганч тумани вакили, асли ўзбек Сулаймон Турсунбоев финалда милисалар мактаби курсантини енгган ва олтин медални қўлга киритган. Мусобақа тугаши билан мағлуб йигитнинг мураббий ва бадавлат танишлари ғолибнинг устозини калтаклашган. Сулаймоннинг ўзини эса шаҳарга олиб кетиб, дўппослашган ва кўчага ташлаб кетишган.

Оғир аҳволдаги Сулаймон Турсунбоевни маҳаллий касалхона ва поликлиникалар қабул қилишмаган. Натижада кўҳна урганчлик 14 яшар курашчи ўз устози билан 500 километр узоқликдаги юрти Дашўғиз вилоятига қайтишга мажбур бўлган. Сулаймон Турсунбоев Кўҳна Урганчда оламдан ўтган.

Марҳумнинг онаси Зиёда Хўжақова ва отаси Матназар Турсунбоев мамлакат президенти Гурбангули Бердимуҳаммедовга мурожаат қилиб, айбдорларни жазолашни сўрашди.

Лекин “Демократический выбор Туркменистана” мухолиф ҳаракати раҳбари Мурад Қурбановнинг айтишича, бу қотилликнинг ортида айнан президент Бердимуҳаммедовнинг яқинлари туришибди. “Сулаймон Турсунбоевнинг финалдаги рақиби Арқадағнинг ўғли Сердар Бердимуҳаммедовнинг қайинукаси, яъни мамлакат ички ишлар вазири Мамметхан Чаққиевнинг жияни бўлган. 14 яшар мағрур болакайни калтаклаганлар ҳам шуларнинг яқинлари бўлишган. Айнан Сердар Бердимуҳаммедов ва Мамметхан Чаққиевларнинг таъқиқи туфайли Ахал вилояти касалхоналари калтакланган дашўғузлик йигитни қабул қилишдан бош тортишган” – деди Мурад Қурбанов.

Унинг айтишича, илгари Арқадағнинг невараси Ашҳободда 16 яшар бир қизни зўрлаб ўлдирган. Унинг яна бир жияни эса хомиладор аёлни қорнига тепиб ўлдирган.

Диктатура ва авторитаризм ана шундай меваларни беради. Бундай режимларда диктатор, унинг яқинлари ва ишонган кишилари истаган ишини, истаган жиноятини қилишади. Жамиятнинг қўрқолиги туфайли уларнинг жиноятлари жазосиз қолиб кетади. Ўзларининг адолатсизлиги билан бу муттаҳамлар бир миллат ичида ўзаро нафрат, турли миллатлар ичида эса ўзаро адоват уруғларини сепишади.

2003 йилда Туркманистоннинг собиқ ташқи ишлар вазири Авди Қулиевдан Москвада “Озод Овоз” веб сайти учун интервью олганман. Интервью тугагач, Хоразмдан эканлигимни айтдим. Шунда раҳматли Авди оға чуқур бир қайғу билан Сапармурот Ниязовнинг дахшатли бир жиноятига гувоҳ бўлганини гапириб берди.

“Сапармурот Туркманбоши мамлакат хавфсизлик хизматини ишга солиб, Дашўғуздан чиройли ўзбек қизларини Ашҳободдаги дачасига олдиришни ва зўрлаб, қизлигини олишни хуш кўрар эди. Бир гал Туркманбоши таҳминан 16-18 яшар жуда чиройли бир дашўғизлик ўзбек қизини дачадаги бассейн ёнида, очиқ ҳавода, тансоқчиларининг кўз ўнгида ҳайвонларча зўрлаётганини ўз кўзим билан кўрганман. Кейин эшитсам, Сапармурот Ниёзов шу қизни зўрлаб бўлгач, отиб ташлаган экан. Чунки зўрланган қиз унинг юзига тупурган экан” – деди Туркманистоннинг собиқ ташқи ишлар вазири, раҳматли Авди Қулиев.

Аллоҳ бундай золимларни Машҳар кунида албатта жазолайди. Лекин уларга қўшиб, золимларнинг адоластизликларига сукут сақлаган қўрқоқларни ҳам жазолайди. Чунки адолатсизликни кўриб, сукут сақлаган киши тилсиз шайтондир.

Фактларни ўрганинг ва фикр қилинг!

Бобомурод АБДУЛЛА

2021 йил 19 февраль

Видео Fakt va Fikr (Maxsus-1): “Arqadağ”ga la’nat! канала Fakt va Fikr