Зойир Мирзаев кимларга кесак кўтартирган эди?

Ўзбекистон Бош вазирининг собиқ ўринбосари Зойир Мирзаев оққўрғонлик мулозим ва фермерларни сувга бўктиргани акс этган сурати тарқалган куннинг ўзида ижтимоий тармоқларда кесак кўтариб турган олти нафар мулозимнинг сурати ҳам пайдо бўлган эди.

Озодлик суриштируви давомида айни сурат 26 октябрь куни Тошкент вилоятининг Бекобод туманида олингани ва суратдаги мулозимлар исм-фамилияларини аниқлашга муваффақ бўлди.

Сурат қаҳрамонларининг айтишларича, буғдой экилган майдоннинг кесаги майдаланмагани учун Бош вазир ўринбосари олти нафар мулозимни шу тариқа жазолаган.

Мулозимлардан беш нафари Бекобод тумани ҳокимлигида турли раҳбарлик вазифаларни бажараётган шахслар ва бир нафари Тошкент вилояти Сув хўжалиги бошқармаси бошлиғидир.

Бекобод тумани ҳокимлиги мулозимига кўра, суратдаги олти кишидан бир нафари ўз аризасига кўра ишдан бўшаган, қолганлар эса вазифасини давом эттирмоқда.

Ижтимоий тармоқларда тарқалган суратда буғдой ўсаётган далада олти киши боши бараварида кесак кўтариб тургани тасвирланган. Суратдагилардан икки нафари иккитадан катта кесак кўтариб олган. Қўлидаги кесаги катта бўлгани учун чапдан учинчи одам уни майишиб кўтариб тургани кўринади.

Видео Зойир Мирзаев кимларга кесак кўтартирган эди? канала Ozodlik Radiosi