Қызылорда облысының бұрынғы әкімі алаяқтық бабымен 7 жылға сотталды

Қызылорда облысының бұрынғы әкімі Қуанышбек Ысқақов бүгін сот үкімімен 7 жылға бас бостандығынан айырылды. Жеті ай бұрын ол әкім қызметінде отырғанда алаяқтық бабымен, яғни Арыс қаласындағы жарылыстан кейінгі құрылысқа жиналған қайырымдылық қорының 80 миллион теңгесін жымқырды деген күдікпен үй қамағына алынған еді. Онымен қоса осы іске қатысты тағы 4 адамның қолына сот залында кісен салынды. Ал бұрынғы әкімінің қорғаушысы қылмысқа ешқандай дәлел жоқ деп үкіммен келіспейтіндерін айтты.
Қуанышбек Ысқақов облыс әкімі қызметіне тағайындалғанына небәрі тоғыз ай толғанда, осы жылдың көктемінде үй қамағына алынды. Ол 80 миллион теңгені алаяқтықпен өз пайдасына жаратпақ болды деген күдікке ілінген болатын. Ал ол миллиондар Арыс қаласында болған жарылыстан жапа шеккен қарапайым халыққа қайырымдылық есебінде жиналған еді. Бейбіт күндегі жарылыстың кесірінен баспаналарынан айырылып қаладан бас сауғалай қашқан мыңдаған тұрғынға тиесілі ақшаны қалтасына баспақ болғаны үшін сот басты фигурант Қуанышбек Ысқақовты кінәлі деп тапты.
АБДУЛЛАЖАН САЙДУЛЛАЕВ,Қызылорда қаласы екінші сотының судьясы:
– Қуанышбек Ысқақов ҚР ҚК-нің 190-бабының 4-бөлігінің 2-тармағымен кінәлі деп танылсын. 7 жылға бас бостандығынан айыру жазасы қолданылсын. Бас бостандығынан айыру жазасы қауіпсіздігі орташа мекемелерде өтелсін.
Сонымен қоса тағы төрт адамның осы іске қатысы бары анықталды. Олардың екеуі Мұрат Имандосов пен Марат Делмұханов сол кезде әкімнің орынбасары қызметтерін атқарған. Бұрынғы шенділер 6 жылға сотталды. Сот үкімінде Қуанышбек Ысқақтың қылмыстық жолмен алған қаражаттары қайтарылып, жәбірленуші «Сыр мейірімі» қоғамдық-әлеуметтік қорына 5 миллион теңгеден аса ақша төлеуді міндеттеді. Бірақ өздеріне тағылған айыптарға бұрынғы әкім де, басқа сотталушылар да осы кезге дейін келіспейтіндерін айтып келді. Ал Қуанышбек Ысқақовтың қорғаушысы үкім ешқандай дәлелдерсіз шығарылды деп есептейді.
ЖАЛҒАС АСҚАРОВ, Қуанышбек Ысқақовтың қорғаушысы:
– Біз ақтауды сұрағанбыз. Дәлелденбеген. Қылмыстық заңнамалардың талаптары бұзылған. Бұл түпкілікті шешім емес. Дәлел жоқ.
Қорғаушы бұған дейінгі сот процестерінде Ысқақовтың да, қасындағылардың да кінәсіз екенін дәлелдегенбіз дейді. Сондықтан апеллияциялық сотқа шағымданатындарын айтады. Бірақ бұрынғы үш шенді мен қасындағы сыбайластарының қолына сот залында кісен салынды. Ал туыстарына сотталушылармен тек сот ғимаратының сыртында ғана қоштасу мүмкіндігі болды.
Абай Нұржанұлы, Рахымжан Ысқақов
Бізді әлеуметтік желіде оқыңыздар:
Youtube -https://www.youtube.com/channel/UCKJIfb3BN2x14J4U30wzLeA/featured?sub_confirmation=1
Facebook - https://www.facebook.com/informburo31/
Instagram - https://instagram.com/informburo31
Vkontakte - https://vk.com/informburo31
TikTok - www.tiktok.com/@informburo31
WhatsApp Информбюро +7 777 331 31 31

Видео Қызылорда облысының бұрынғы әкімі алаяқтық бабымен 7 жылға сотталды канала Информбюро 31