МОЛИТВЫ БОЖИЕЙ МАТЕРИ В ЦЕРКОВНЫЙ ПРАЗДНИК БЛАГОВЕЩЕНИЕ ПРЕСВЯТОЙ БОГОРОДИЦЫ | тексты с ударениями

Читать молитвы (с ударениями) ко Божией Матери и Царице Небесной в Великий церковный праздник православного календаря – 7 апреля 2024 Благовещение Пресвятой Богородицы на канале @молитвыдлядуши

Моли́тва 1‑я

Приими́, Всеблагомо́щная, Пречи́стая Госпоже́ Влады́чице Богороди́тельнице, сия́ честны́я да́ры, Тебе́ еди́ной прикла́дныя от на́с, недосто́йных рабо́в Твои́х, от все́х родо́в избра́нная, все́х тва́рей небе́сных и земны́х вы́шшая я́вльшаяся. Поне́же бо Тебе́ ра́ди бы́сть Госпо́дь си́л с на́ми, и Тобо́ю Сы́на Бо́жия позна́хом, и сподо́бихомся Свята́го Те́ла Его́ и Пречи́стыя Кро́ве Его́. Те́мже блаже́нна еси́ в ро́дех родо́в, Богоблаже́нная, Херуви́мов светле́йши и Серафи́мов честне́йши су́щая. И ны́не, Всепе́тая Пресвята́я Богоро́дице, не преста́й моля́щися о на́с, недосто́йных рабе́х Твои́х, е́же изба́витися на́м от вся́каго сове́та лука́ваго и от вся́каго обстоя́ния: и сохрани́тися на́м неврежде́нным от вся́каго ядови́таго прило́га диа́вольскаго. Но да́же до конца́ моли́твами Твои́ми неосужде́нных на́с соблюди́: я́ко да Твои́м заступле́нием и по́мощию спаса́еми, сла́ву, хвалу́, благодаре́ние и поклоне́ние за вся́ в Тро́ице Еди́ному Бо́гу и все́х Созда́телю возсыла́ем, ны́не и при́сно и во ве́ки веко́в. Ами́нь.

Моли́тва 2‑я

К Тебе́, Пречи́стей Бо́жией Ма́тери, а́з окая́нный, припа́дая, молю́ся: ви́ждь, Цари́це, я́ко безпреста́нно согреша́ю и прогневля́ю Сы́на Твоего́ и Бо́га моего́. И мно́гажды а́ще ка́юся, ло́жь пред Бо́гом обрета́юся, и ка́юся трепе́ща, да не ка́ко порази́т мя́ Госпо́дь, и по часе́ ма́ле па́ки та́яжде творю́. Сия́ ве́дущи, Влады́чице моя́, Пресвята́я Богоро́дице, почто́ не поми́луеши, почто́ не укрепи́ши мя́, и чесо́ ра́ди не пода́си ми́ всегда́ блага́я твори́ти? Ве́си у́бо, о, Влады́чице, я́ко отню́дь и́мам в не́нависти зла́я моя́ дела́ и все́ю мы́слию люблю́ зако́н Бо́га моего́. Но не ве́м, Госпоже́ Пречи́стая, отку́ду я́же ненави́жду, та́я творю́, и се́й преступа́ю. Но не попуща́й, Пресвята́я, во́ли мое́й соверша́тися, неподо́бна бо е́сть, но да бу́дет во мне́ во́ля Сы́на Твоего́ и Бо́га моего́, да мя́ спасе́т, и вразуми́т, и пода́ст ми́ благода́ть Свята́го Ду́ха, дабы́ а́з отны́не преста́л скверноде́йствовати, и про́чее бы́х пожи́л в повеле́ниих Сы́на Твоего́, Го́спода на́шего Иису́са Христа́, Ему́же подоба́ет вся́кая сла́ва, че́сть, поклоне́ние и велеле́пие со Безнача́льным Его́ Отце́м и с Пресвяты́м и Благи́м и Животворя́щим Его́ Ду́хом, ны́не и при́сно и во ве́ки веко́в. Ами́нь.

Моли́тва 3‑я

О, Пресвята́я, Богоизбра́нная Де́во, Свята́го Уте́шителя Ду́ха Всенепоро́чная Неве́сто, Пребоже́ственнаго же Отца́ Небе́снаго Дще́рь Превожделе́нная, посреде́ те́рния ми́ра сего́ Те́м обре́тенная, я́ко кри́н пресве́тлый добро́тою де́вства блиста́ющийся, да Сы́ну Бо́жию Чи́стая Ма́терь Неискусобра́чная будеши! Что́ убо воздади́м Тебе́ в пресве́тлый де́нь се́й Благовещения, во́ньже Арха́нгела Гаврии́ла красото́ю безме́рнаго де́вства Своего́ удиви́ла еси́ и от того́ неизрече́нное обра́дование восприя́ла еси́? Что́ принесе́м Тебе́ за вся́ утеше́ния Твоя́, и́миже возвесели́ла еси́ в де́нь се́й ве́сь ми́р ви́димый и неви́димый, наипа́че же па́дший дре́вле ро́д челове́чь? Дне́сь спасе́ния на́шего нача́ло и е́же от ве́ка та́инства явле́ние: ны́не у́бо Сло́во Бо́жие ти́хо сни́де с небе́с, я́ко ка́пля ка́плющая на зе́млю, и всели́ся в Твою́ Богоблагода́тную Де́вственную утро́бу и бы́сть Пло́ть спасе́ния на́шего ра́ди. Ты́ же, Де́во, разреши́ла еси́ от го́рькия рабо́ты ве́сь ро́д челове́чь и свобо́дою Христо́вою естество́ же́нское почти́ла еси́, зане́ де́вством чи́стым па́ки и́стинную жи́знь ввела́ еси́, и сего́ ра́ди же́ны, де́вство держа́ще, врага́ я́ве побежда́ти начина́ют. Ны́не Ада́м лику́ет, ви́дев, я́ко в пресве́тлый де́нь се́й испо́лнися на Тебе́ пе́рвое ра́йское благове́стие, я́ко се́мя Жены́ сотре́т главу́ зми́я. С ни́мже ликовству́ет ны́не ве́сь ро́д челове́чь, поне́же Тобо́ю, Пречи́стая, упраздни́ся дне́сь дре́внее отвраще́ние Бо́жие к челове́ком, Бо́га бо па́ки привела́ еси́ к на́м. Сего́ ра́ди зри́м Тя́ ны́не, я́коже дре́вле Иа́ков, я́ко Ле́ствицу Высо́кую, Е́юже сни́де Бо́г на зе́млю и я́ко Мо́ст пречу́ден, и́мже су́щих от земли́ па́ки возво́диши на не́бо. Вся́ на́ши же́ртвы и приноше́ния ничто́же су́ть пред вели́чеством благодея́ний Твои́х. Еди́ное то́чию уго́дно Тебе́: “се́рдце сокруше́нно и смире́нно”, его́же и Сы́н Тво́й и Госпо́дь на́ш “не уничижи́т”. Сего́ ра́ди мо́лим Тя́: испо́лни на́с от превосходя́щия высоты́ смире́ния Своего́ ели́ка вмести́ти возмо́жем, да принесе́м Ти́ во всесвяты́й де́нь Благове́щения Твоего́ Твоя́ от Твои́х, во е́же во вся́цем де́ле бла́зе не мы́слити высо́кая, но вы́ну в смире́нии ду́ха пребыва́ти. Се́ю пе́рвейшею доброде́телию укра́шени, в пресве́тлый де́нь сего́ пра́здника Твоего́ в кро́тости и чистоте́ се́рдца со Арха́нгелом Гаврии́лом возопие́м тебе́:
Радуйся, Благода́тная,
Радуйся, Обра́дованная,
Радуйся, Преблагослове́нная, Госпо́дь с Тобо́ю и Тобо́ю с на́ми во ве́ки веко́в. Ами́нь.

#молитвыдлядуши #церковныйкалендарь #благовещение

Видео МОЛИТВЫ БОЖИЕЙ МАТЕРИ В ЦЕРКОВНЫЙ ПРАЗДНИК БЛАГОВЕЩЕНИЕ ПРЕСВЯТОЙ БОГОРОДИЦЫ | тексты с ударениями канала Молитвы для Души