"Таҳлилнома" Ўзбекистонда ҳафтанинг энг муҳим янгиликлари. 4 апрел 2021 йил | Tahlilnoma

"Таҳлилнома" кўрсатуви
"Ўзбекистон 24" телеканали
Ҳаётимизнинг яна етти куни ортда қолди ва одатдагидек Таҳлилнома орқали ўтган етти кунда содир бўлган воқеалар шарҳига киришамиз. Ҳа, бугун инсоният жуда қийин вақтни ўз бошидан кечирмоқда, аммо ҳар қандай қийинчилик ҳаётимиз йўлларида муаммоларининг энг мақбулини топишга тажриба ҳамдир.
29 март куни Президент Шавкат Мирзиёев кимё саноати тармоғида амалга оширилаётган лойиҳалар тақдимоти билан танишди.
Жорий йилда 60 миллион долларлик 8 та лойиҳа ишга туширилиши, келгусида умумий қиймати 2 миллиард 600 миллион доллардан зиёд бўлган яна 18 та лойиҳа амалга оширилиши қайд этилди.
“Ўзкимёсаноат” акциядорлик жамияти тузилмасини ўзгартириш, малакали кадрлар тайёрлаш, янги лойиҳалар ишлаб чиқиш бўйича топшириқлар берилди.
30 март куни Кўксарой қароргоҳида мамлакатимизга расмий ташриф билан келган Венгрия Бош вазири Виктор Орбанни кутиб олиш маросими бўлди. Шавкат Мирзиёев ва Виктор Орбан шоҳсупага кўтарилди. Ўзбекистон ва Венгрия давлат мадҳиялари янгради.
Маросимда икки мамлакат расмий делегацияси аъзолари, дипломатик корпус вакиллари ҳам ҳозир бўлди.
Президент Шавкат Мирзиёев ва Бош вазир Виктор Орбан тор доирадаги учрашувда сиёсий, савдо-иқтисодий, инвестициявий, молиявий-техник ва маданий-гуманитар соҳалардаги ҳамкорликни ривожлантириш истиқболлари муҳокама қилинди.
Томонлар Ўзбекистон–Венгрия муносабатларини ўзаро ишонч ва кенг доирадаги умумий манфаатларга асосланган стратегик шериклик даражасига кўтаришга тайёр эканлигини тасдиқладилар.
Ўзбекистон Президенти Шавкат Мирзиёев ва Венгрия Бош вазири Виктор Орбан музокараларни икки мамлакат расмий делегациялари иштирокида давом эттирдилар.
Музокарада икки томонлама ҳамкорликда ҳали ишга солинмаган жуда катта имкониятлар борлиги таъкидланди. Шу боис асосий эътибор савдо-иқтисодий, инвестициявий ва молиявий алоқаларни янада ривожлантириш масалаларига қаратилди.
Ҳудудлараро ва маданий-гуманитар ҳамкорликни ривожлантириш масалалари ҳам муҳокама қилинди.
Музокаралар якунида Президент Шавкат Мирзиёев ва Бош вазир Виктор Орбан Ўзбекистон Республикаси билан Венгрия ўртасидаги стратегик шериклик тўғрисидаги қўшма декларацияни имзоладилар.
Шунингдек, ташриф доирасида кўп қиррали шерикликни кенгайтиришга қаратилган 10 дан ортиқ ҳужжат имзоланди. Маросимда икки мамлакат вазирликликлари раҳбарлари имзоланган ҳужжатларни алмашдилар.
Сўнг оммавий ахборот воситалари учун брифинг бўлиб ўтди.
Президент Шавкат Мирзиёев ва Бош вазир Виктор Орбан Юқори Чирчиқ туманида очилган Ўзбекистон-Венгрия Картошкачилик илмий марказини бориб кўрди.
Марказда «in vitro», ўсимликлар патологияси, картошкани сақлаш физиологияси, сифат назорати бўйича лабораториялар ташкил этилган.
Меҳмонлар фермерлар учун ташкил этилган агрохизматлар маркази, юртимиз қишлоқ хўжалигида қўлланилаётган техника ва технологияларни ҳам кўздан кечирди.

Видео "Таҳлилнома" Ўзбекистонда ҳафтанинг энг муҳим янгиликлари. 4 апрел 2021 йил | Tahlilnoma канала UZBEK TV