Семейдің медициналық авиациясы мал ұстайтын қыстақты ұшып-қонатын жерге айналдырған

Семейдің медициналық авиациясының арнайы ұшып-қонатын алаңы жоқ болғандықтан, олар қала іргесіндегі мал ұстайтын қыстақтың жерін жалға алып, амалдап жүр. Ал дәрігерлер болса қонатын жеріміз ыңғайсыз, әрі ұшқан сайын жанымызды шүберекке түйіп отырамыз дейді. Шығыстың алыс-жақын аудандарынан ауыр халдегі науқастарды тасымалдайтын медициналық авиация биылдың өзінде 110 мәрте әуеге көтеріліпті.
Дәрігерлер ауыр халдегі науқастарға осы жерден аттанады. Асфальт жолдан бұрылып, ұшаққа дейін бір шақырымдай жүру керек. Көктем мен күзде саз батпақ болса, ал қыста қалың қар.
ГҮЛНАР ҚҰСПАНОВА, аға фельдшер:
– Біздің қонатын жеріміз де өте ыңғайсыз. Қонатын жер үлкен асфальтталған жер болса деп... Енді біздің Үкіметке деген үлкен ұсынысымыз бар. Ыңғайлы болса деп. Ыңғайлы ұшатын, қонатын, науқастарды әкететін ыңғайлы жер болса дегеніміз ғой.
ЕРЗАТ ЖАНАТҰЛЫ, тілші:
– Семейдің медициналық авиациясы алыс аудандардағы науқастарға дәл осы жердегі қораның артынан ұшып, қораның артына қонып жүр. Бұл жер - жекенің иелігіндегі жер.
Биылға дейін медициналық авиацияда екі әуе компаниясы қызмет көрсетіп, екі ұшақ ұшқан екен. Осы жылы науқастарды тасымалдау тек «Тараз жаңа әлем» әуе компаниясы арқылы ғана жүзеге асып келеді. Тараздық компания Семейдің қайта жаңғыртудан өткен әуежайына тұрақтауды қымбатсынған тәрізді. Оның үстіне жұмыс істеу кестесі де сәйкеспейді екен.
ЮРИЙ КОВАЛЕНКО, борт командирі:
– Ол жерде жақсы әрине. Дегенмен, барлығы ақылы негізде ғой және қымбаттау. Көктем, күз мезгілдеріндегі ауа райының қолайсыз кездерінде сол әуежайдан ұшамыз.
Медициналық авиация арқылы жыл басынан бері жүз он мәрте шұғыл көмек көрсетілген. Дәрігерлер жүз қырық үш адамның өміріне араша түссе, оның отыз жетісі бала болған екен. Айтпақшы, бүгінгі науқастарды тасымалдауға авиация 80-ші жылдары шыққан АН-2 ұшағын қолданады.
Бізді әлеуметтік желіде оқыңыздар:
Youtube -https://www.youtube.com/channel/UCKJIfb3BN2x14J4U30wzLeA/featured?sub_confirmation=1
Facebook - https://www.facebook.com/informburo31/
Instagram - https://instagram.com/informburo31
Vkontakte - https://vk.com/informburo31
TikTok - www.tiktok.com/@informburo31
WhatsApp Информбюро +7 777 331 31 31

Видео Семейдің медициналық авиациясы мал ұстайтын қыстақты ұшып-қонатын жерге айналдырған канала Информбюро 31