Ақ халат киген азамат жалған екпе паспортын сатып жатқан жерінен ұсталды

Еліміздегі екі ірі Нұр-Сұлтан мен Алматы қалаларында коронавирусқа қарсы вакцинаның жалған паспорты мен қолдан ПТР анықтамаларын жасап сатқан медицина қызметкерлері ұсталды. Олар бұл қызметтері үшін клиенттерден 6000 теңгеден 15 000 теңге аралығында сыйақы алып келген. Тіпті өзге елде отырып, ақылы жалған құжаттардың электронды нұсқасын жасап, оны Телеграм мессенджері арқылы жіберіп отырған Қазақстан азамат та анықталды. Полицейлер қазір бұл жағдайларға қатысты қылмыстық іс қозғады. Егер жасаған қылмыстары дәлелденсе онда жалған вакцина паспортын дайындап, оны саудаға салғандар төрт жылға дейін бас бостандығынан айырылуы, ал сол құжатты пайдаланғандар 40 тәулікке дейін қамауға алынуы мүмкін.
Мына видеожазбадағы ақ халат киген азамат Нұр-Сұлтандағы медицина орталықтарының бірінің директоры. Ол ауру жұқтырмағаны туралы жалған ПТР тестілеу анықтамасын жасап, сатып жатқан жерінен ұсталды. Орталық басшысы заңсыз анықтама үшін клиенттерінен 6000 теңгеден алып отыр. Қазір полицейлер осы клиникадан заңсыз құжат алған адамдардың санын анықтап жатыр. Бұл елордада тіркелген екінші жағдай екен.
ДАНИЯР ОРАЛОВ, Нұр-Сұлтан қалалық Полиция департаментінің өкілі:
– 1989 жылы туылған азамат 6000 теңгеге осындай жалған анықтамаларды жасап келлген. Екінші дерек бойынша ҚР азаматы шет елде отырып, 5500 теңгеге жалған медициналық анықтамаларды жасап келген. Бұл дерек бойынша да ҚК 385 - бабымен іс қозғалып, тергеп тексеру жүргізілуде. Бұл бапқа сәйкес азамат төрт жылға дейін бас бостандығынан айырылуы мүмкін.
Ал бұл Алматылық дәрігердің қолдан ПТР анықтамасын жасап ұсталған сәті. Ол алдына келген тұрғыннан еш сынама алмай, әп-сәтте жалған құжат дайындап берген. Алматыдағы медициналық орталықтарға тексеріс жүргізген полицейлер дәл осындай жалған ПТР анықтамасын жасап, оны сатқандардың ішінде «Достар Мед» және «Сұңқар» жеке клиникаларының қызметкерлері де бар дейді.
Сондай-ақ, коронавирусқа қарсы вакцинаның жалған паспортын жасап, флакондарды заңсыз жойып жіберген Алматыдағы №4-ші ауруханаға қызметкері де ұсталды. Ол қызметі үшін 15 000 теңге алғанын мойындаған. Жалпы елімізде жыл басынан бері ПТР тестілеу нәтижелері мен вакцинация паспорттарын қолдан жасау бойынша 30 жағдай тіркелген. Ал осыдан тура екі күн бұрын Үкіметтің кеңейтілген отырысын өткізген президент Қасым- Жомарт Тоқаев жалған вакцина паспортын жасап сатқандарды қатаң жазаға тартуды тапсырған болатын.
Жанар Қожанова, Жомарт Құдайбергенов
Бізді әлеуметтік желіде оқыңыздар:
Youtube -https://www.youtube.com/channel/UCKJIfb3BN2x14J4U30wzLeA/featured?sub_confirmation=1
Facebook - https://www.facebook.com/informburo31/
Instagram - https://instagram.com/informburo31
Vkontakte - https://vk.com/informburo31
TikTok - www.tiktok.com/@informburo31
WhatsApp Информбюро +7 777 331 31 31

#вакцинация_паспорты #құжат #міндетті_екпе

Видео Ақ халат киген азамат жалған екпе паспортын сатып жатқан жерінен ұсталды канала Информбюро 31